Nga Enver Robelli
Ministri i Financave i landit të Hessenit në Gjermani ka bërë vetëvrasje. Kufoma e tij është gjetur në një linjë hekurudhore. Mediat po supozojnë se politikani Thomas Schäfer ka bërë vetëvrasje nga tronditja se nuk do të mund të plotësojë të gjitha pritjet që populli mund të ketë në kohën e koronavirusit.
Kryeministri i Hessenit Volker Bouffier tha: “Ma merr mendja se këto shqetësime e kanë shkatërruar”. Thomas Schäfer ishte politikan i përzemërt. Doktor i drejtësisë. Në kohë të lirë i pëlqente të ziente ushqime të ndryshme. Një gazete gjermane ai i tha: “E kam sqaruar raportin tim me të dashurin zot”. Politikani gjerman bën vetëvrasje nën barrën e përgjegjësisë që ndien ndaj popullit. Tepër tragjike. Ndërsa politikani kosovar (shumica e tyre) këtë hall nuk e ka.
Hall i vetëm i politikanit kosovar është pushteti. Edhe politikanët e Kosovës janë njerëz. Shpeshherë të papërgjegjshëm. Dhe gjithnjë e më shpesh: të ndyrë. Asnjëri prej tyre nuk do duhej të bëjë vetëvrasje, larg asaj, por secili do të duhej të ishte përgjegjës para votuesit. Dhe secili duhet t’i lë anash interesat elektorale apo interesat primitive personale.