Një ngjarje e rëndë ka tronditur Kosovën ditën e sotme. Sipas mediave lokale, personi me inicialet B.K., nga fshati Bërnjak, Komuna e Rahovecit është vënë në pranga pasi akuzohet se ka vrarë të vëllanë, me inicialet B.K.., të cilit më pas i ka djegur edhe trupin.
Ngjarja makabre është zbuluar pasditen e sotme, ndërsa i ndjeri, 64 vjeç, ishte raportuar i zhdukur nga familja që në datën 14 shkurt. Grupi hetimor ka gjetur armën me të cilën është kryer vrasja dhe si prova, janë mbledhur kockat e ndjerit, që i vëllai ia kishte lënë të mbledhura në një cep të oborrit të shtëpisë.
Ditën që kishte djegur trupin e të vëllait në oborr, autori kishte ndezur një zjarr të madh dhe kjo gjë kishte tërhequr edhe vëmendjen e policiSë. Për të mbuluar krimin, ai kishte djegur edhe mbeturina me trupin e të ndjerit, duke kamufluar ngjarjen para efektivëve, kur e kishin pyetur. Mirëpo ditën e sotme, gjithçka u zbulua. Në shtëpinë e autorit të krimit janë gjetur edhe 35 mijë franga e 8 mijë euro që dyshohet të jenë edhe shkaku i krimit të rëndë. Mendohet se viktima kishte sjellë këto para nga Zvicra dhe mes dy vëllezërve kishte pasur një sherr.
Konfliktin për paratë e ka treguar në polici edhe e shoqja e vitkimës, e cila mësohet se ka hedhur dritë mbi ngjarjen. Gruaja nuk kishte marrë vesh asgjë për të shoqin që nga dita e të dashuruarve, por sot u përball me një grumbull kockash. Tashmë autori do të përballet me drejtësinë, pasi edhe ka pranuar krimin e rëndë.
Prokuroria Themelore në Gjakovë, Departamenti për Krime të Rënda, njoftoi se gjatë ditës së sotme është arrestuar dhe me pas ndaluar personi me inicialet G.K., i cili sipas hetimeve të para dyshohet për veprën penale “Vrasja e Rëndë” të vëllait të tij, personit me inicialet B.K. i cili pasi që kishte ardhur nga Zvicra në Kosovë, fillimisht ishte paraqitur i zhdukur nga familjarët e tij që nga data 14.02.2020.
Pas veprimeve hetimore nga ana e Prokurorisë dhe Policisë, dyshohet se personi G.K. e ka vrarë dhe më pastaj e ka djegur trupin e të ndjerit B.K, ku në vendin e ngjarjes janë evidentuar disa kocka njeriu. Po ashtu, pas një pune operative është gjetur edhe arma me të cilën dyshohet të jetë kryer vepra penale, si dhe një gëzhoje e cila pas ekzaminimit është vërtetuar së është shkrepur nga arma e të dyshuarit. Gjatë intervistimit në polici, ku prezent ka qenë edhe prokurori i rastit, i dyshuari G.K. e ka pranuar veprën për të cilën dyshohet, duke përshkruar në hollësi mënyrën se si ka vepruar. Me urdhër të prokurorit, i dyshuari është ndaluar, dhe akuzuar për veprat penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve” dhe ndaj tij, brenda afatit ligjor do të kërkohet masa e paraburgimit nga Gjykata kompetente në Gjakovë.