Italia ka urdhëruar 156 emigrantë në bordin e një anijeje gjermane shpëtimi të bllokuar në brigjet perëndimore të Siçilisë që të transferohen në një anije tjetër dhe të karantinohen.
Emigrantët, kryesisht nga Afrika dhe Lindja e Mesme, më pas duhet tu nënshtrohen kontrolleve shëndetësore, thanë zyrtarët italianë.
Anijes gjermane të shpëtimit, Alan Kurdi, i është refuzuar hyrja në portet italiane dhe malteze për shkak të frikës së koronavirusit.
Ministria e Transportit në Itali tha se masa ishte e nevojshme sepse shërbimet shëndetësore të Siçilisë ishin në situatë të vështirë tashmë.
Lejimi i zbritjes së emigrantëve nga anija Alan Kurdi, e operuar nga grupi humanitar gjerman Syri i Detit, do të përbënte presion të madh mbi autoritetet lokale të ishullit, tha shefi i mbrojtjes civile të Italisë, Angelo Borrelli.
Italia regjistroi sot 19.899 vdekje nga koronavirusi dhe më shumë se 156,363 të infektuar që prej fillimit të pandemisë.
Vetëm në 24 orët e fundit humbën jetën 431 pacientë, shifra më e ulët ditore e regjistruar prej më shumë se 3 javësh.