Dy fasoneri janë gjobitur në Krujë dhe dy mjete transporti të punonjësve të tyre janë bllokuar pasi nuk kanë respektuar masat e vendosura për shkak të pandemisë nga koronavirusi.
Sipas burimeve zyrtare të policisë një fasoneri u ndëshkua me 100 mijë lekë për mosrespektim të distancës mes punëtorëve ndërsa një tjetër me 300 mijë lekë për mosrespektimin e kësaj mase në automjetin e punonjësve.
Njoftimi i policisë:
Strukturat e Policisë në DVP Durrës vazhdojnë monitorimet për zbatimin e masave për parandalimin e përhapjes së COVID-19.
Ndëshkohen me masë administrative 2 fasoneri dhe bllokohen 2 mjete që transportonin punëtorët.
Strukturat e Krimit Ekonomik dhe Financiar në DVP Durrës, në bashkëpunim me ISHSH, në vijim të kontrolleve për subjektet që nuk kanë zbatuar masat e mara për parandalimin e gjendjes së shkaktuar nga COVID-19, kanë marrë masë administrative ndaj 2 fasonerive në Krujë.
Një fasoneri u ndëshkua me 100.000 lekë, për mosrespektimin e distancës midis punëtorëve dhe një tjetër u ndëshkua me 300.000 lekë, për mosrespektimin e distancës në automjetin e punonjësve. Mjetet janë sekuestruar dhe aktiviteti i fasonerisë u mbyll për mungesë së kushteve higjeno-sanitare.
Policia vijon kontrollet në territor për monitorimin e zbatimit të masave dhe apelon për të gjithë qytetarët, bizneset dhe drejtuesit e automjeteve që të respektojnë masat kufizuese dhe masat mbrojtëse.