Ka përfunduar rreth orës 1.00 pas mesnata “aventura” e 58-vjeçarit me probleme të shëndetit mendor në Skrapar, i cili qëlloi ne ajer me arme zjarri e me pas mbi policinë.
Sipas njoftimit zyrtar të policisë, Hekuran Hoxha rreth orës 19.30 të ditës së djeshme qëlloi me armë zjarri automatik dhe më pas u kyç në shtëpinë e tij ku u dorëzua vetëm në orën 0.15 pas mesnatës.
Burime jozyrtare bëjnë të ditur se dhe vëllai i tij 61 vjeç gjithashtu vuan nga probleme mendore.
NJOFTIMI
Skrapar
Ndërhyrja e Reneas vë në pranga personin që qëlloi me armë në ajër dhe më pas Policinë.
Sekuestrohet arma e zjarrit kallashnikov dhe një sasi municioni luftarak.
Rreth orës 01:00 të datës 29.04.2020, forcat speciale “Renea” kanë vënë në pranga shtetasin H. H., 57 vjeç, banues në lagjen ”5 Shtatori”, Skrapar.
Ky shtetas, në orët e mbrëmjes së djeshme, në katin e parë të një pallati, ka qëlluar në ajër me armë zjarri dhe më pas kur ka parë shërbimet e Policisë ka qëlluar edhe në drejtim të tyre. Më vonë, ky shtetas u fut në banesë dhe nuk iu përgjigj thirrjeve të Policisë për t’u dorëzuar.
Shërbimet e Policisë morën masa sigurie dhe rrethuan pallatin. Në ndihmë të Policisë vendore shkuan shërbimet e Drejtorisë Vendore të Policisë Berat dhe më pas forcat speciale “Renea”.
Pas ndërhyrjes së forcave speciale “Renea” u bë e mundur vënia në pranga e 57-vjeçarit dhe u sekuestrua edhe arma kallashnikov, bashkë me një sasi municioni.
Materialet i kaluan Prokurorisë, për veprime të mëtejshme.