Një 24-vjeçar nga Takaxhistani është arrestuar në Tiranë pasi ishte shpallur prej një jave në kërkim ndërkombëtar nga Gjermania. Ai akuzohet për “Pjesëmarrje në një organizatë të huaj terroriste”, i dyshuar si anëtar dhe pjesëmarrës i kësaj organizate të huaj terroriste, e themeluar si celulë terroriste në Gjermani për të bërë xhihad në emër të shtetit islamik (ISIS).
Ndërkohë pesë shtetas të tjerë nga Takixhistani, pjesë e grupit ku bënte i riu i arrestuar në Tiranë u arrestuan më 15 prill në Gjermani.
Sipas prokurorisë së Karlsruhe në Gjermani ata kishin planifikuar të sulmonin përfshi dhe bazat ajrore të SHBA dhe kishin porositur tashmë në internet një pjesë të municioneve. Madje ata kishin planifikuar edhe të sulmonin një person që besonin se kishte shprehur kritika për islamin në publik.
Në fakt mediat në ato ditë thanë se dy prej të dyshuarve kishin udhëtuar për në Shqipëri për të kryer një atentat në këmbim të 40 mijë dollarëvem por projekti u dështoi.
NJOFTIMI I PLOTE
Drejtoria e Antiterrorit
Finalizohet me sukses operacioni “Vizitori”.
Operacioni, nga Drejtoria e Antiterrorit, në bashkëpunim me Interpol Tirana.
Vihet në pranga, me qëllim ekstradimi, një shtetas nga Taxhikistani.
24-vjeçari, i shpallur në kërkim ndërkombëtar, i kërkuar në Gjermani.
Drejtoria e Antiterrorit, në vijim të punës për parandalimin, evidentimin dhe kapjen e personave me tendenca terroriste apo pjesëtarë të organizatave terroriste, si dhe në kuadër të shkëmbimit të informacionit me homologët dhe agjencitë ligjzbatuese brenda dhe jashtë vendit, ka organizuar dhe finalizuar operacionin e koduar “Vizitori”.
Në kuadër të këtij operacioni u bë i mundur identifikimi, kapja dhe më pas arrestimi, për qëllime ekstradimi, i shtetasit të huaj K. Z., 24 vjeç, nga Taxhikistani.
Ky shtetas ishte person i shpallur në kërkim ndërkombëtar nga Interpol ëiesbaden, Gjermani, pasi në ngarkim të tij, Gjykata Federale në Karlsruhe, Gjermani, më datë 21.04.2020 ka lëshuar urdhrin e arrestit ndërkombëtar, për veprën penale “Pjesëmarrje në një organizatë të huaj terroriste”, i dyshuar si anëtar dhe pjesëmarrës i kësaj organizate të huaj terroriste, e themeluar si celulë terroriste në Gjermani për të bërë xhihad në emër të shtetit islamik (ISIS).
Materialet e para hetimore iu referuan Prokurorisë pranë Gjykatës së Shkallës së Parë Tiranë, me qëllim kryerjen e procedurave të mëtejshme ligjore për ekstradimin e këtij shtetas të huaj.