Presidenti i Kosovës, Hashim Thaçi, ka ftuar homologun e Rusisë, Vladimir Putin, që ta vizitojë Kosovën. “Kosova nuk është armike e Rusisë. I bëj thirrje atij të vijë në Kosovë. Është e rëndësishme që ne të ndërtojmë një marrëdhënie të mirë, të krijojmë një lidhje” , tha Thaçi, në një intervistë për agjencinë shtetërore ruse të lajmeve, RIA Novosti.
I pyetur për vazhdimin e dialogut ndërmjet Serbisë dhe Kosovës, Thaçi është përgjigjur se “dialogu duhet të zhvillohet pa kushte nga të dyja palët”.
Presidenti kosovar ka thënë se beson se “Serbia nuk duhet të kërkojë shfuqizimin e taksës si kusht për vazhdimin e negociatave”.
I pyetur rreth mundësisë së një pjesëmarrjeje të mundshme më aktive të Rusisë në negociatat ndërmjet Beogradit dhe Prishtinës, Thaçi ka thënë se Bashkimi Evropian aktualisht e luan rolin udhëheqës në procesin e dialogut, dhe këtë rol do ta luajë edhe në të ardhmen.
Ai ka theksuar se është “frymëzuar shumë” nga biseda e drejtpërdrejtë që ka zhvilluar në Paris me Putinin, dy muaj më parë, kur presidenti serb i ka thënë Thaçit se “nëse Kosova dhe Serbia arrijnë një marrëveshje për paqe, nëpërmjet dialogut, ai do ta pranojë dhe do ta mbështesë një dokument të tillë”.
“Ky është një hap i ri dhe pozitiv”, ka vlerësuar Thaçi.