Bujar Sheshi ka kallëzuar Autoritetin e Dosjeve në Prokurori, teksa këmbëngul në qëndrimin e tij se nuk ka qenë kurrë bashkëpunëtor apo ish-anëtar i ish- Sigurimit të Shtetit.
Aktualisht, anëtar i KLP, Sheshi e akuzon Autoriteti e Dosjeve për falsifikim dokumentesh dhe shpërdorim detyre. Ai thotë se të gjitha faktet janë tërreme dhe nuk përputhen me të dhënat e administruara nga AIDSSH.
Një ditë më parë për rastin e tij reagoi edhe Prokuroria e Përgjithshme. “Vonesa në kthimin e përgjigjes nga AISSH dhe plotësimi i deklaratës individuale të nënshkruar prej prokurorit Bujar Sheshi, përkundrejt përgjegjësisë ligjore, që nuk përputhet në përmbajtje me Vendimin e AISSH, janë objekt i një hetimi të thelluar nga prokuroria kompetente”, thuhet në njoftimin e Prokurorisë së Përgjithshme.
Në sqarimin e saj, orrgani i akuzës thotë se pjesë e dokumenteve të dorëzuara prej kandidatit Bujar Sheshi, ishte deklarata e tij individuale, sipas të cilës, nuk ka qenë anëtar, bashkëpunëtor apo i favorizuar i ish-Sigurimit të Shtetit deri më datë 02 Korrik 1991 si dhe Formulari përkatës i Autoritetit të Informimit mbi Dokumentet e ish-Sigurimit të Shtetit (AIDSSH).
Ndërsa vetë AIDSSH tha një ditë më parë se “Për rastin në fjalë, nga administrimi i dokumentacionit që disponojmë dhe nga verifikimet e kryera në fondet arkivore të cilat përmbajnë dokumente të ish-Sigurimit të Shtetit, të cilat ruhen në godina të ndryshme, shumë larg nga zyrat aktuale të AIDSSH, u ndeshëm me ekzistencën e dokumenteve kontradiktore për sa i takon të dhënave për shtetasin Bujar Sheshi, si dhe me faktin e njohjes me dokumentin e tërheqjes në bashkëpunim të shtetasit Bujar Sheshi në moshë të mitur (nën 18 vjeç). Në këtë kontekst, u zhvillua dhe procesi i riverifikimit, përmes Drejtorisë së Gjendjes Civile, të gjeneraliteteve të shtetasit Bujar Sheshi (kontradiktore me të dhënat e shënuara në Formularin e Aplikimit nga vetë z. Sheshi)”.
Vetë Sheshi deklaroi në mbledhjen e djeshme të KLP-së sërish se nuk ka qenë bashkëpunëtor i Sigurimit.