Policia e Lezhës bën të ditur se është vënë në pranga i dyshuari si bashkëpunëtor i vrasjes së rapsodit të njohur Kol Murrani dhe mikut të tij. Burime policore bëjnë të ditur se është arrestuar A.L., 35 vjeç i cili bashkë me Aleksandër Përdodën, tashmë në qeli kanë qëlluar mbi dy personat në Lalm.
Ndërkaq, në kërkim vijon të jetë vëllai i Përdodës për përkrahje të autorit të krimit dhe fshehje të provave.
Ngjarja e rende ndodhi me 27 prill ne Lalm te Lezhes dhe shkak dyshohet te kene qene konflikt pronesie.
NJOFTIMI I PLOTE
Lezhë
Vijon intensivisht puna hetimore për zbardhjen dhe dokumentimin e plotë me prova ligjore të ngjarjes së ndodhur në Lalm Lukaj, Lezhë.
Kapet dhe ndalohet bashkëpunëtori i autorit të dyshuar të vrasjes me armë zjarri të shtetasve K. M. dhe P. S.
Vihet në pranga 35-vjeçari, i dënuar më parë për plagosje me armë.
Në lidhje me zbardhjen e ngjarjes së datës 27 prill, grupi i posaçëm hetimor, i përbërë nga specialistë të Krimeve të Rënda në Departamentin e Policisë Kriminale dhe të DVP Lezhë, nën drejtimin e Prokurorisë Lezhë, në vijim të veprimeve, në bashkëpunim edhe me Institutin e Policisë Shkencore, ka bërë të mundur sigurimin e provave shkencore për bashkëpunëtorin e autorit të dyshuar të ngjarjes.
Bazuar në këto prova shkencore është bërë kapja dhe ndalimi i shtetasit A. L., 35 vjeç, banues në Lalm Lukaj, Lezhë, me precedent kriminal, i dënuar më parë për plagosje me armë.
Materialet procedurale u referuan në Prokurorinë e Rrethit Gjyqësor Lezhë, në ngarkim të shtetasit A. L., për veprat penale “Vrasja në rrethana të tjera cilësuese” e kryer në bashkëpunim dhe “Armëmbajtja pa leje”.