Prefekti i Qarkut Dibër, Nexhbedin Shehu u takua me banorët e lagjes së llixhave, të cilët prej disa ditësh ankohen në lidhje me koncesionin e burimeve kurative. Banorët kërkojnë shfuqizimin dhe anullimin e koncesionit, duke e konsideruar atë korruptiv.
Janë 35 hotele private që dëmtohen në se nuk anullohet vendimi, duke lënë në mëshirë të fatit të paktën 200 familje.
Prefekti kishte thirrur për t’u informuar mbi procedurën edhe dy përfaqësuesit e Bashkisë Dibër në Këshillin e Basenit Ujor Drin-Bunë. Megjithëse ato kanë votuar kundër, vendimi është miratuar paçka se nga 21 anëtarë, kanë marrë pjesë në mbledhje 13 veta. Mësohet se këshilltarët nuk kanë informuar këshillin bashkiak në kohën e duhur dhe janë shprehur se nuk mbajnë përgjegjësi për vendimin e Basenit Ujor.
Prefekti garantoi banorët se shqetësimet e tyre do t’ia përcjellë prefektit të Shkodrës në cilësinë e kryetarit të Këshillit të Basenit dhe Kryeminitrit Rama për t’u shqyrtuar sërish mënyra se si është vepruar për dhënien me konçesion të llixhave.