OFL vijon me 4 shënjestrat e radhës duke u çuar formularin që kanë 48 orë kohë për ta plotësuar.
Kësaj radhe OFL është ndalur në Tiranë ku i ka dërguar formularin 3 personave të dënuar për vjedhje me armë. Ndërkohë një personi me inicialet në I.R, në Shkodër i është dërguar formulari pasi është në arrest me burg për kryerje të disa veprave penale në kuadër të një grupi kriminal.
Këtyre personave OFL u kërkon të deklarojnë pasurinë brenda 48 orëve me të gjitha pyetjet drejtuar atyre ose në të kundërt u sekuestrohen pasuritë.
NJOFTIMI NGA POLICIA
Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
– O. I., banues në Tiranë, i dënuar për veprën penale “Vjedhja me dhunë”;
– K. A., banues në Tiranë, i dënuar për veprën penale “Vjedhja me armë”;
– E. K., banues në Tiranë, i dënuar për veprën penale “Vjedhja me armë, e kryer në bashkëpunim”;
– I. R., banues në Shkodër, person nën hetim, për të cilin Gjykata e Shkallës së Parë për Krimet e Rënda ka caktuar masën e sigurimit personal “Arrest në burg”, për veprat penale “Shtrëngim me anë të kanosjes për dhënien e pasurisë, e kryer në bashkëpunim, në kuadër të grupit të strukturuar kriminal” dhe “Kryerja e veprave penale nga organizata kriminale apo grupi i strukturuar kriminal”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.