Pasi propozoi emrin e ri për kryetar të KLSH-së kreu i shtetit Ilir Meta bën publike dhe një letër që i ka dërguar kreut të Kuvendit, Gramoz Ruçi, si një përgjigje ndaj këtij të fundit.
Referuar dhe lajmit për një projektligj të maxhorancës për emërimin e zv.kryetarit të KLSH-së, Meta e quan një presion politik ndaj Presidentit.
“Deri tani jam vënë para faktit të kryer të rrëzimit të propozimeve për tre kandidatura radhazi për në KLSH. Të tre këto kandidatura përmbushnin kriteret ligjore dhe gëzonin përvojë të gjerë profesionale. Nisi fushatë në media për miratimin e një projektligji, për emërimin e Zv/Kryetarit të KLSH. Kjo fushatë ka për qëllim ushtrimin e presionit politik ndaj Presidentit”, thuhet mes të tjerash.
Madje ai shkon më tej duke e quajtur presion politik për të propozuar një kandidaturë nga ato që kërkon prej kohësh mazhoranca. “Ky veprim i Kuvendit tregon mungesë vullneti për bashkëpunim me Presidentin. E njëjta qasje e Kuvendit si gjatë procesit të emërimit të anëtarëve të Gjykatës Kushtetuese. Nëse vijohet në drejtimin për kapjen e institucioneve të pavarura, tregues se 3 kandidatët për KLSH u rrëzuan pa të drejtë”, vijon ai.
Meta shton se i ka kërkuar kreut aktual të KLSH-së, Bujar Leskaj të qëndrojë në detyrë. “I kam kërkuar kryetarit të KLSH, z. Bujar Leskaj të qëndrojë në detyrë deri në zgjedhjet e kryetarit të ri. Bujar Leskaj të mos i bindet asnjë urdhri për uzurpimin e këtij pozicioni kushtetues”, thotë ai.