Në orët e fundit të merkatos, Partizani dhe Kamza kanë finalizuar shkëmbimin e dy mbrojtësve. Vlonjati Idrizaj kaloi te kryesuesit e Superiores, ndërsa sot, në ekipin tjetër shkoi beratasi Eneo Bitri. Të dyja palët duken të kënaqura nga ky operacion për momentin, megjithatë mbetet të shihet se çfarë do të tregojë fusha e lojës për të dy lojtarët në fjalë, por edhe skuadrat respektive.
15 herë kampionët e vendit kanë bërë me dije: “Klubi zyrtarizon trasferimin e Eneo Bitrit te skuadra e Kamzës. Mbrojtësi 23-vjeçar, i cili iu bashkua të kuqve në fillim të këtij sezoni nga Tomori, do të kalojë me formulën e huazimit. Marrëveshja është arritur sot, me pëlqimin e të tria palëve. Bitri do të jetë lojtar i Kamzës deri në përfundim të sezonit futbollistik 2018- 2019”.
Rinovimi – Kristi Kote e ka fituar bastin e tij te Partizani. Mesfushori ka bindur dhe sot ka rinovuar për 2 vite e gjysmë.
“Klubi njofton marrëveshjen me Kristi Koten. Mesfushori 21-vjeçar ka nënshkruar sot kontratën e re, për dy vite e gjysëm, me të drejtë rinovimi edhe për një tjetër vit. Kote, i cili iu bashkua ekipit në fillim të sezonit aktual dhe është aktivizuar në disa takime si titullar, konsiderohet pjesë e rëndësishme e projektit të klubit. Drejtuesit do të vazhdojnë të ndjekin një strategji të tillë, duke iu besuar dhe mbështetur lojtarët e rinj të talentuar”.
