Cdo fundjanari degët lokale të Partisë Demokratike në Dibër, Mat e Bulqizë festonin përvjetorin e themelimit. Mblidheshin së bashku, kryesisht në mjedise të bollshme dhe festonin. Këngë, valle e fjalime.
Por këtë vit nuk ka ndodhur kështu dhe ende nuk ka një shpjegim nga drejtuesit lokal të PD dhe LSI. Qarku Dibër ka në përbërje të tij katër bashki, tre prej të cilave drejtohen nga PD, përkatësisht Mati e Klosi dhe Bulqiza nga LSI-ja.
Burime pranë këtyre degëve shprehen se kanë nisur përplasjet dhe debatet e forta mes “grupeve rivale” për caktimin e kandidatëve për kryetarë bashkie. Strukturat aktuale të PD-së në këto rrethe janë kundër kryetarëve aktual të bashkive, madje u kanë kërkuar atyre të largohen dhe t’i hapin rrugën kandidatëve të rinj. Jo vetëm kaq.
Në Bulqizë e Klos PD është në konflikt të hapur me LSI-në. Vartësit e Kryemadhit në Bulqizë kanë nisur përgatitjet për zgjedhjet e reja lokale, duke lënë që tani jashtë “loje” kryetarin në detyrë, Melaim Damzi. Më keq akoma në Klos. Sipas mediave vendase, drejtuesit e bashkisë do të përballen me organet e drejtësisë për shkeljet ligjore që kanë kryer.
Pas 28 vitesh degët e PD-së kanë “harruar” të festojnë themelimin e partisë që lindi si shpresë për shqiptarët.