Një nga vendimet më të vështira në rikthimin e futbollit, ishte mungesa e tifozëve. Shkallët e stadiumit stonojnë pa koreografitë e tyre dhe loja më e dashur, duket më e varfër. Megjithatë, në Kategorinë Superiore, tifozët e Tiranës që gjithnjë kanë mbushur stadiumet, nuk e kanë çuar nëpërmend të qëndrojnë larg skuadrës së zemrës, sidomos në këtë sezon ku bardheblutë janë në hapat e fundit për të siguruar titullin kampion.
Ata, edhe pse në një numër simbolik, ishin prezentë në transfertën e Ballshit, ndërsa më të shumtë janë shfaqur ditën e djeshme në Gjirokastër teksa në momente të caktuara me thirrjet e tyre nga jashtë rrethimit të stadiumit bënë te ndjehej prezenca.
Tashmë, shpresat janë që sa më shpejt duke parë edhe ecurinë pozitive të epidemisë në Shqipëri, tifozët të lejohen të rikthehen në stadiume për të ndryshuar atmosferën e vakët dhe për të mos i lënë jashtë kangjellave. Kujtojmë se me tifozë po luhet në Mal të Zi apo edhe Hungari.

