Një 25-vjeçar ka humbur jetën mbrëmjen e të enjtes, pasi është qëlluar me thikë nga një i mitur. Aleksandër Petanaj ka ndërruar jetë katër orë më pas në spital si pasojë e plagëve të marra.
Ndërkaq, policia bën të ditur se si autor i ngjarjes është vënë në pranga një 15-vjeçar. Ngjarja ka ndodhur në lagjen “24 maji” të Vlorës, në vendin e quajtur “ish ushqimorja” ku pas një konflikti për motive të dobëta, G.T e ka goditur me thikë Petanajn.
NJOFTIMI I PLOTE
Më datë 18.06.2020, rreth orës 22:50, në Spitalin Rajonal Vlorë ka shkuar i dëmtuar nga një mjet prerës, shtetasi A. P., 25 vjeç, banues në Vlorë, i cili ka ndërruar jetë pak orë më vonë.
Menjëherë pas ngjarjes, Policia nisi hetimet për zbardhjen dhe dokumentimin e saj dhe falë veprimeve të shpejta, hetimore dhe profesionale u bë identifikimi në kohë rekord, kapja dhe prangosja e autorit, shtetasit G. T., 15 vjeç, banues në Vlorë.
Nga hetimet e kryera dyshohet se ngjarja ka ndodhur në lagjen “24 Maji” Vlorë, pranë vendit të quajtur “Ish-ushqimores”, ku pas një konflikti për motive të dobëta, shtetasi G. T. ka goditur me mjet prerës (thikë) shtetasin A. P., i cili ndërroi jetë rreth 4 orë më vonë në ambientet e spitalit.
Grupi hetimor po kryen veprimet e mëtejshme në lidhje me ngjarjen e ndodhur.