Në përditësimin e saj të të dhënave, Ministria e Shëndetësisë bëri të ditur se është ulur numri i rasteve të shtruara në spitalin Infektiv.
76 pacientë janë aktualisht, pasi ky numër shkoi në mbi 80-të duke bërë gati dhe hapjen e spitalit COVID-2, ish Kirurgjia e QSUT-së. Por ndërkohë në terapinë intensive janë të shtruar 14 persona, dy prej tyre të intubuar. Pas disa ditësh me nga një rast humbe jete në ditë, fatmirësisht sot nuk ka pasur.
“Ndërkohë që në spitalin infektiv aktualisht po trajtohen 76 pacientë, 14 prej tyre janë në terapi intensive, ndërsa 2 janë të intubuar. Lajmi i mirë është se në 24 orët e fundit janë shëruar 33 qytetarë, duke e çuar në 1250 numrin e të shëruarve që nga fillimi i epidemisë. Në vendin tonë janë aktualisht 894 persona aktivë me COVID19, kryesisht në Tiranë, Shkodër, Durrës. Ministria e Shëndetësisë dhe Mbrojtjes Sociale i drejtohet të gjithë qytetarëve të respektojnë masat e vendosura, ndërsa bizneset të zbatojnë protokollet e miratuara të sigurisë”, bëri të ditur ISHP.