Ish-presidenti i klubit të futbollit Deportivo La Coruna, Tino Fernandez, ka mundur të rikuperojë stoli dhe sende të tjera me vlerë të cilat ishin grabitur nga një bandë shqiptarësh që vepronte në veri të Spanjës me 8 shkurt. Vlera e tyre kap shifrën e 70,000 eurove.
Banda që dyshohet se ka kryer grabitjen e përbërë nga shqiptarë midis 20 dhe 25 vjeç ka rënë në pranga gjatë operacionit policor të koduar “Scarpia”.
Numri i të arrestuarve nuk bëhet me dije por mediat vendase duke ju referuar policisë thonë se pritet që të ketë më shumë arrestime.
Edhe pse ata tani ishin vendosur në Katalonjë , ku u gjetën xhevahiret e ish-presidentit, ato vepronin kryesisht në jug të Pontevedra dhe La Coruña.
Vjedhjet e banesave u kryen në dy periudha kohore pak para pandemisë. Sipas Guardia Civil, grabitësit shqiptarë i kishin kryer vjedhjet gjatë periudhës 15-28 janar dhe 5-17 shkurt, ku u arrestua njëri prej anëtarëve.
Për grabitjet ata përdornin makina luksoze për të mos tërhequr vëmendjen ndërsa shënjestër e tyre nuk ishin njerëzit e thjeshtë por pasanikët.
Ata e dinin fare mirë çfarë kërkonin dhe nga cilat shtëpi nuk do të dilnin duarbosh.
“Ata nuk hynin në çdo shtëpi, por vetëm në banesat e pronarëve që kishin një standard të lartë jetese” tha Garda Civil.