Detaje tronditëse dalin nga ngjarja horror në Kombinat, ku vajza dhe nëna janë gjetur të pajeta dhe në gjendje të rëndë vajza tjetër.
Ekspertiza paraprake ka treguar se 30-vjeçarja Anisa Josifi ka ndërruar jetë 15 muaj më parë, por trupi është mumifikuar pasi ditë pas dite është mbështjellë me çarçafë të hollë.
Këtë e ka konfirmuar dhe vajza tjetër, 34-vjeçarja Blerta Josifi e cila ndodhet në spital. Blerta ka deklaruar se ajo dhe nëna kanë refuzuar çdo gjë, ushqim, ujë etj për 40 ditë.
“Nëna vdiq, unë mbijetova”, i tha policisë 34-vjeçarja. Policia hyri nga dritarja e banjës ditën e djeshme në banesën e tyre sepse ballkoni ishte mbyllur me kangjella hekuri.
Ndërkaq, burri i motrës së Zhanetës, ka rrëfyer për mediat se kishte një vit që nuk e takonte Anisën. “Kisha një vit që nuk e takoja Anisën. Kur kam shkuar në shtëpi kunata dhe Blerta më kanë thënë që nuk e ka mbushur akoma afatin për të dalë dhe nëse unë do e shihja Anisën e ndëshkonte Zoti”, ka deklaruar kunati.
Sipas tij, familja Josifi ishte praktikante prej shumë vitesh dhe kontaktin e pare me këtë sekt e kanë marrë në Përmet, ndërsa më vonë frekuentonin një qendër tek “Selvia”.
Kunati ka deklaruar po ashtu se iu ka kërkuar që të hiqnin dorë nga praktikat e këtij sekti pasi bënin sakrifica shumë të mëdha dhe madje ka shkuar dhe në polici dhe bashki. Këto ankesa kanë bërë edhe që mes Zhanetës dhe motrës së saj të lindnin konflikte.
“I shkova në shtëpi kërkova Anisën dhe më thanë nuk e lemë të dali se nuk ka bërë ditët e zotit. Anisën kisha që në mars të 2019 që nuk e shikoja fare.
I kam folur dhe për punën e fesë, por me urrenin. Në fillim janë rekrutuar në Përmet pastaj librat i kanë marrë tek një qendër tek “Selvia”. Dy javë më parë shkova të takoja posaçërisht Anisën, por nuk më lejuan. Më ndaluan tek dera. Ato nuk ushqeheshin”, ka treguar ai.
Mësohet se grupi hetimor ka dalë në përfundimin se shkaku i vdekjes së nënës dhe vajzës është agjërimi i gjatë.