Një megaoperacion i realizuar nga autoritetet britanike ka çuar në pranga plot 746 të arrestuar, e mes tyre dhe një shqiptar 24-vjeçar. Ky është operacioni më i madh i kryer ndonjëherë nga Agjensia Kombëtare e Krimit (NCA).
Mësohet se shqiptari akuzohet për shitje të armëve të zjarrit, municione dhe drogë. I riu shqiptar, Alsi Vata, banues në Deptford, do të paraqitet në Gjykatën e Leeds Crovvn në 17 korrik.
Vata u arrestua nga NCA, që njihet si FBI-ja britanike dhe oficerët e Policisë Metropolitane të enjten, si pjesë e një operacioni i cili çoi pas hekurave më shumë se 800 të dyshuar, të arrestuar në të gjithë Evropën.
Për operacionin ka reaguar edhe ministrja e Brendshme britanike Priti Patel. Ajo duke ndjekur nga afër operacionin është bërë dëshmitare e arrestimit të shqiptarit, e fotot i ka publikuar në rrjetet sociale.
“Sot iu bashkova Agjencisë Kombëtare të Krimit në një operacion në agim si pjesë e aksionit më të madh të zbatimit të ligjit në Mbretërinë e Bashkuar kryer ndonjëherë, duke rezultuar në 746 arrestime”, shkruan ajo.
Ata u arrestuan pas përgjimeve dhe deshifrimit të mesazheve në telefona.
Hetuesit thanë se sekuestruan 54 milion £ kesh, dy tonë kokainë dhe 77 armë zjarri përfshirë armë sulmi, mitralozë dhe granata.