Ish-deputeti demokrat e ka quajtur rrumpallë marrëveshjen e sotme mes mazhorancës dhe opozitës së re për votimin e 5 qershorit dhe ndryshimeve kushtetuese. Më tej ai ka ironizuar me Ramën, duke thënë se pse nuk e shpall veten perandor.
Ish-deputeti demokrat, Enkelejd Alibeaj ka komentuar marrëveshjen e arritur mes mazhorancës dhe opozitës parlamentare, për kalimin e marrëveshjes së 5 qershorit dhe ndryshimeve kushtetuese. I ftuar në studion e “Ora News”, Alibeaj u shpreh se njëra marrëveshje kundërshton tjetrën, ndërsa e quan rrumpallë atë që ndodhi sot. Sipas tij kryeministrin e kanë kapur paranojat e humbjes.
“Rrumpallë. E vetmja gjë që mund të kuptohet në këtë pikë, duket se njeriu që e ka kapur paranoja e humbjes, duket se zgjidhja që ka zgjedhur është shkatërrimi i kushtetutës, shkatërrimi i 5 qershorit, që ka dhe bekimin e ndërkombëtarëve”, tha Alibeaj.
Më tej Alibeaj ka shtuar, se një çmenduri e tillë mund të kalohet me të qeshur.
“Pse nuk vendos të mos ketë fare zgjedhje dhe të shpallë veten perandor, vetëm me të qeshur mund të kalohet një çmenduri e tillë”, vijoi ai.