Përfaqësuesit e opozitës jashtëparlamentare në Këshillin Politik, Oerd Bylykbashi dhe Petrit Vasili kanë folur pas mbledhjes së Këshillit Politik. Ish-deputeti i Partisë Demokratike, Oerd Bylykbashi u shpreh se nisma e opozitës është shumë e qartë që kërkon lista të hapura dhe të mos preken koalicionet dhe mënyra e shpërndarjes së mandateve.
Më tej Bylykbashi tha se mazhoranca duhet të reflektojë dhe të pranojë hapjen e 100% të listave, pasi kjo çështje i takon vetëm Këshillit Politik.
“Sot ne kemi depozituar një nismë të qartë. Qëndrimi ynë është shumë i qartë nëse listat do hapen, ato do hapen 100%, por me kusht që të mos ndryshojë formula e koalicioneve dhe për ndarjen e mandateve. Edi Rama hapjen e listave e ka vetëm për të hequr koalicionet. Edi Rama u hap listat, por u mbyll të drejtën që të japin votën për një parti të casktuar. Rama kërkon që të ndryshojë rregullat e garës, ne kërkuam qëndrimin politik nga përfaqësuesi i mazhorancës, por ai refuzoi ta bënte këtë gjë. Ne i dhamë dhe modelet në Evropë dhe ata refuzuan sërish që të jepnin qëndrimin e tyre. Modeli i koalicioneve si në Shqipëri, përdoret në Danimarke, Itali, Estoni, Greqi etj. Por Edi Rama kërkon të vrasë të drejtën e partive politike për tu bashkuar në liri të plotë. Ne presim nga maxhoranca që të reflektojë dhe kjo çështje i takon Këshillit Politik. Ne jemi gati në çdo kohë për diskutime”, tha Bylykbashi.