Emanuel Egbo vazhdon me performancat fantastike në krye të tiranës. Pasi udhëhoqi bardheblutë në suksesin për kampionatin, duke u shndërruar në teknikun e parë afrikan që fiton titullin në Europë, tashmë Egbo ka vendosur një tjetër rekord në krye të kryeqytetasve.
47-vjeçari është bërë i pari afrikan që fiton një ndeshje në Ligën e Kampionëve, një fakt ky që është nënvizuar nga mediat nigeriane. Sakaq, Egbo ka dhënë një prononcim për ESPN ku tregon objektivin e Tiranës në këto eliminatore, teksa trajneri pretendon të prekë grupet e Champions League.
“Objektivi ynë është të arrijmë në fazën e grupeve të Champions-it, dhe prej andej, ne do të vendosim një objektiv tjetër për veten tonë. Asnjë skuadër shqiptar nuk ka arritur ta bëjë këtë gjë. Kështu që ne shpresojmë që të futemi në fazën e grupeve. Kjo do të ishte arritje e madhe për një ekip shqiptar”, u shpreh Egbo.
