Ish ministri i Jashtëm Ditmir Bushati përmes një postimi në Facebook duke folur mbi zgjedhjet parlamentare të 30 gushtit në Malin e Zi thotë se shqiptarët kanë qenë vendimtar në shpalljen e garantimin e pavrësisë në vitin 2006 dhe anëtarësimit në NATO në 2017. Sipas tij këto zgjedhje do të jenë përcaktuese për koordinatat e stabilitetit politik dhe orientimin strategjik të fqinjit tonë.
POSTIMI I PLOTE
Këtë të dielë Mali i Zi zhvillon zgjedhjet parlamentare. Zgjedhje këto përcaktuese për koordinatat e stabilitetit politik dhe orientimin strategjik të fqinjit tonë.
Shqiptarët në Malin e Zi kanë qenë vendimtar në shpalljen dhe garantimin e pavarësisë në vitin 2006 dhe anëtarësimin në NATO në vitin 2017.
Para një viti në Tuz, kësaj të diele në Ulqin, Guci, Plavë dhe në të gjithë Malin e Zi, duke votuar masivisht për kandidatët dhe partitë politike shqiptare të grupuara në dy koalicione, shqiptarët kanë mundësi të mbrojnë e promovojnë të drejtat e tyre në bashkëjetesë me malazezët dhe grupet e tjera etnike dhe njëkohësisht të fuqizojnë identitetin euro-atlantik të Malit të Zi.
Maksimizimi i votës dhe forcimi i përfaqësimit të partive shqiptare në parlament, shoqëruar me thellimin e partneritetit me forcat progresiste malazeze përbën garanci për sigurimin e stabilitetin politik në vend, rrugën euro-atlantike, dhe respektimin e të drejtave të shqiptarëve në Mal të Zi.
Një fqinj stabël, demokratik, në harmoni ndëretnike, anëtar i NATO-s dhe bashkëudhëtar në rrugën drejt anëtarësimit në BE, është në interesin e Shqipërisë dhe promovimin e marrëdhënieve të fqinjësisë së mirë në Europën Adriatike.
