Katër zyrtarë dhe ish zyrtarë të Ministrisë së Drejtësisë kanë përfunduar në pranga, teksa priten dhe arrestime të tjera për abuzime me tenderat gjatë periudhës 2016-2017, kur institucioni drejtohej nga figurat e LSI-së, Petrit Vasili dhe Ylli Manjani.
Në pranga kanë përfunduar 4 persona, mes të cilëve edhe ish-sekretarja e Përgjithshme në Ministrinë e Drejtësisë, Juliana Hoxha, drejtori ekonomik Aurel Lamçe, ish-drejtori i Shërbimeve Mbështetëse, si dhe specialistë të IT-së. Për të tjerët janë dhënë masa më të buta, si dhe “arrest shtëpie”.
Ka qenë grupi i inspektimit, i Ministrisë së drejtësisë dhe më pas ai i Ministrisë së Financave, që kanë evidentuar shkeljet me pasoja të rënda për buxhetin e shtetit.
Tenderat në fjalë kapnin vlerën e disa milionë eurove, ndërsa po verifikohen edhe veprimet dhe përgjegjësia konkrete e ish ministrit të Drejtësisë, Ylli Manjani, por edhe ish ministri Petrit Vasili, pasi po hetohet pikërisht periudha kur institucioni drejtohej prej tyre.
Shkeljet më të rënda janë raportuar në lidhje me shërbimin e kamerave në burgje, ndërsa ka dyshime se edhe regjistri noterial nuk funksiononte.
Pesë procedurat e tenderimit, ku janë evidentuar shkeljet:
- Mirëmbajtja dhe mbikqyrja e sistemit ICMIS në 7 Gjykatat Administrative
- Përmirësimi i sistemit të mbikqyrjes elektronike në fushën penale
- Përmirësimi, Zhvillimi dhe Mirëmbajtja e Regjistrit Noterial Shqiptar
- Sistemi i Monitorimit me kamera për burgun e Lezhës dhe Fushë Krujës
- Përmirësimi dhe mirëmbajtja e sistemit elektronik të çështjeve të përmbarimit
