Apple ka përjashtuar zyrtarisht mundësinë e një sulmi kibernetik pas një ndërprerjeje masive të martën që preku shërbimet kryesore të kompanisë, duke lënë përkohësisht jashtë funksioni iCloud, Apple Pay, Apple Music dhe disa platforma të tjera të mëdha.
Sipas kompanisë, shkaku i bllokimit masiv nuk ka qenë ndonjë ndërhyrje e jashtme apo dashakeqe, por një përditësim i brendshëm sistemi që shkaktoi anomali në funksionimin e shërbimeve.
Ekipet e inxhinierëve të Apple kanë ndërhyrë menjëherë për normalizimin e situatës. Shumica e shërbimeve të prekuara janë rikthyer tashmë në funksion të plotë, ndërsa po punohet intensivisht për rivendosjen e sistemeve të mbetura që ende mund të shfaqin probleme për përdoruesit.
Ky incident vjen në një kohë kur autoritetet kanë raportuar edhe ndërprerje të tjera të veçanta teknike që kanë përfshirë agjenci apo institucione të rëndësishme si NSA dhe FAA (Administrata Federale e Aviacionit në SHBA). Edhe në ato raste, zyrtarët konfirmuan se ndërprerjet nuk kishin lidhje me kërcënime kibernetike, por ishin pasojë e problemeve teknike të brendshme.
