Javën e parë të saj si ministre e Arsimit, Evis Kushi e ka nisur duke shoqëruar për në shkollën vajzën e saj të madhe Ana, që sikurse thekson ajo, e ka shoqen më të mirë. Teksa ka postuar një foto në Facebook, ministrja Kushi apelon për mbajtjen e maskës, ruajtjen e distancës dhe zbatimin e çdo rregulli që ruan shëndetin e nxënësve, mësuesve e gjithë të tjerëve.
“Para nisjes së një jave intensive me angazhimet dhe sfidat e reja, e kisha të pamundur të mos bëja një copëz rrugë deri tek shkolla e saj me një shoqe shumë të mirë timen, vajzën e madhe Ana.
Bisedova sërish me të mbi rëndësinë e mbajtjes së maskës, ruajtjen e distancës me shoqet dhe shokët e klasës dhe zbatimin e çdo rregulli që ruan shëndetin e saj, nxënësve, mësuesve e gjithë të tjerëve.
Koha që po kalojmë është e pazakontë në çdo aspekt, e në këtë kuadër, nevojitet kujdes shumë më i madh dhe respektim i çdo mase që frenon përhapjen e koronavirusit. Vetëm në këtë formë do të arrijmë të gjithë së bashku ta kalojmë këtë sfidë aspak të lehtë për çdo njeri.
Javë të mbarë të gjithëve!”, shkruan Evis Kushi