Tre djemtë e zhdukur në Malësinë e Madhe nuk janë gjendur ende ndërsa babai i njërit prej tyre, Klementit, i përlotur para mediave thotë se dyshon se djalin e kanë vrarë. Nush Pepaj thotë se nuk ka parë te i biri asgjë të paligjshme, pasi është përfolur se bëhej fjalë për mosmarrëveshje për drogën e mbjellë.
“Unë nuk i kam parë ndonjë bollëk leku, jo se i kam kontrolluar ndonjëherë xhepat, që të konstatoja se mund të ishte marrë me ndonjë gjë të paligjshme. Nëse gjërat i ka bërë jashtë fshatit edhe mundet, se me djemtë që ka pasur këtu ka pas marrëdhënie shumë të mira. Nuk kam futur njëherë në shtëpi, njerëz që nuk i njihja. Policia duhet të ndërhyjë më me forcë në këtë zonë, edhe pse e shoh që bëjnë kërkime. Ka qenë në Francë, ka qenë në Zvicër, nga aty më pas më duket se e kanë ekstraduar, por nuk më ka thënë nëse e kanë ngatërruar me gjë. Djalin do ta kërkoj sa të gjendet, shteti të ndërhyjë sa më shumë, të gjejë të gjitha lidhjet e tij, unë dyshoj se ai është i vramë. Më hyri frika për vrasje, pasi ka pasur konflikte më parë me kushërinjtë e tij. I ka bërtit me mos me bë zhurmë kushëririt të tij. Ai i ngacmonte gocat në lokal në fakt,”- tha Nush Pepaj.