Merret në mbrojtje nga policia, familja e të dyshuarit kryesor për vrasjen e dy të rinjve në fshatin Vrith të Malësisë së Madhe.
Familja e Danjel Pepaj, i shpallur në kërkim, po ruhet nga efektivë të policisë nga frika e një hakmarrje të mundshme.
Ndërsa babai i të shumëkërkuarit Rrok Pepaj është arrestuar nga policia, si person që mund të ketë pasur dijeni për krimin e kryer nga i biri, efektivë të policisë qëndrojnë në oborrin e shtëpisë për të shmangur ndonjë konflikt të mundshëm.
Babai i të dyshuarit u arrestua, pasi dyshohet se Danjeli pas krimit ka shkuar në shtëpi dhe ka ndërruar rrobat dhe Rrok Pepaj mund të kishte dijeni për atë që kishte bërë i biri.
Trupat e dy të rinjve Vilson Çutaj dhe Klement Pepaj, u gjetën mesditën e së enjtes, nga kërkimet intensive të policisë në terrenin e thyer, të vrarë me armë zjarri.
Kufomat u gjetën të mbuluar me shkurre dhe larg nga njëri-tjetri.
Dyshohet se Olsi Çutaj ka shoqëruar me makinë të vëllanë Vilson Çutaj, Klement Pepaj dhe Danjelin drejt fshatit Vrith ku u ulën në një kafe, nga ku nisën të debatonin dhe më tej u larguan drejt parcelave të mbjella me kanabis.
Dyshohet se konflikti ka nisur për kanabis, një borxh që Danjeli i kishte Vilsonit. Parcelat e tyre kanë qenë afër. Duke hyrë në procesin e korrjes, Vilsoni pretendonte që i ishte vjedhur një sasi prej 50 kilogramë drogë, për të cilat akuzonte Danjelin.
Danjel Pepaj dyshohet të jetë rrahur nga dy viktimat për drogën, çka a bërë që ku i fundit të organizojë vrasjen duke i çuar në një pyll, ku mendohet se do iu kthente kanabisin.