Ndarja nga jeta e drejtorit të Bashkisë së Tiranës, Feti Fanaj ka përlotur kryetarin e Bashkisë, Erion Veliaj.
Teksa po zhvillonte një takim me banorët e njësisë numër 8 në kryeqytet, Veliaj nuk la pa përmendur mikun e tij, i cili humbi betejën me koronavirus.
“Ne ishim këtu më përpara kur filloi viti shkollor edhe në atë takim e nisa duke bërë një dedikim për një mikun tonë i cili në atë kohë ishte sëmurë, Feti Fanaj. Fatkeqësisht ai pasi punoi të gjithë verën për t’u siguruar që shkollat dezinfektoheshin, që higjienizoheshin, që bëheshin gati me të gjitha solucionet, që bëheshin gati me të gjitha rregullimet, me të gjitha riparimet, u sëmur dhe fatkeqësisht nuk e fitoi atë betejë. Arsyeja se pse e them këtë është jo për të prishur gëzimin, por për të kujtuar që në një familje kemi gëzime, por kemi edhe hidhërime”, tha Veliaj.
Feti Fanaj, drejtor në Bashkinë e Tiranës humbi jetën të hënën. Fanaj, 39-vjeç, po kurohej në Turqi, por nuk mundi t’i mbijetojë sëmundjes. Feti Fanaj ishte drejtori i Përgjithshëm të Objekteve Publike në Bashkinë e Tiranës.