Instituti i Studimeve Politike, gjatë vitit 2018 zhvilloi një anketim me deputetët e Kuvendit lidhur me kualifikimin e tyre, nivelin e angazhimit politik, vlerësimin për politikën dhe aktivitetin parlamentar, njohjen e rregullores dhe ligjit dhe sugjerimet për përmirësim në të ardhmen.
Nga anketa e zhvilluar, ISP, në bazë të rezultateve të mbledhura, ka arritur në përfundimin se 12% e të zgjedhurve tanë në Kuvend nuk i kuptojnë ligjet, por nuk hezitojnë ti votojnë ato.
Stafi i ISP ia adresoi pyetësorin të gjitha grupeve parlamentare (në formë kolektive) dhe mbi 100 deputetëve (në komunikim nominal) dhe përgjigjet e marra nga grupet parlamentare ishin minimale.
Kreu i ISP, Afrim Krasniqi, i pyetur nga Ora Neës është shprehur se 12% e deputetëve e deklarojnë publikisht që nuk njohin ligjet që votojnë. Krasniqi thekson dhe pasojën që kanë këto ligje në shoqëri, pasi dhe ata që i votojnë nuk arrin ti kuptojnë.
‘Ne kemi parë se rreth 12% e deputetëve deklarojnë në mënyrë publike që kanë votuar ligje pa i kuptuar ato, do të thotë që nuk kanë informacion për ligjet. Të votosh ligje pa i kuptuar, imagjino pasojën e madhe që ne kemi në shoqëri. Ky është tregues i asaj kategorie deputetësh që kanë hyrë rastësisht në politikë’, ka thënë Afrim Krasniqi.