Mungesa e Klaus Gjasulës në grumbullimin e Kombëtares shqiptare për ndeshjen kundër Kosovës, ka pasur një arsye shumë të veçantë. Mesfushori nuk udhëtoi drejt vendit tonë për atë ndeshje me mirëkuptimin e stafit teknik, pasi kishte një arsye shumë të forte për të qëndruar në Gjermani.
Gjatë ditës së martë, Gjasula mungoi në stërvitjen me Hamburgun dhe u mendua se ai ishte nisur drejt Shqipërisë. Por më pas klubi bëri të ditur se mesfushori 30-vjeçar festonte një ditë të veçantë në jetën e tij pasi ishte bërë baba. Kjo kishte qënë edhe arsyeja se pse Gjasula kishte kërkuar më shumë ditë kohë për t’iu bashkuar Shqipërisë, pasi donte të ishte pranë bashkëshortes së tij në këto momente për të pritur të birin që po vinte në jetë.
Gjasula pritet t’i bashkohet vetëm nesër kuqezinjve, për t’u bërë pjesë e skuadrës dhe mundësisht për të qenë në fushën e lojës në ndeshjet ndaj Kazakistanit dhe Bjellorusisë.