Ish-kryeministri i Shqipërisë në periudhën e luftës së Kosovës, aktualisht ministër i Diasporës, Pandeli Majko ka publikuar një status në Facebook, si një tjetër provë që vërteton krimet e serbëve. Majko ka sjellë historinë e një vajze 17-vjeçe që humbi jetën në luftë dhe amanetin dy ditë para vrasjes nga serbët.
“LIRIA KA EMER
Yllka Domi ka lindur në Gjakovë më 17 Qershor 1982. Ajo u bë pjesëtare e Brigadës 137 “Gjakova” të Ushtrisë Çlirimtare të Kosovës.
Yllka humbi jetën më 7 maj 1999 gjatë betejës së Çabratit, e cila po zhvillohej në mes të forcave të UÇK-së dhe ushtrisë serbe.
Dy ditë para vdekjes, Yllka, 17 vjecare, shkroi vargjet e saj të fundit:
“Amanet ju le nëse nuk pritoni,
Të ma shkruani emrin në rërën e detit,
Dhe dy vargje mi shkruani me shkrimin e saj,
Në krahët e valëve të ketë epope të pambaruar,
Dhe arena e kafazit të jetë e hapur
Përmendore nuk dua…!
Nëse në kurrizin e qytetit gjeni një shkop,
Vendosni afër kokës sime.”
…Ushtarakët serbë trupin e Yllkës bashkë me trupat e tjerë të vrarë në betejë i dërguan në një varrezë masive në Batajnicë (Serbi).
Pas identifikimit të eshtrave nga ekspertët e mjekësisë ligjore, Yllka Domi u rivarros me 23 dhjetor 2003, në kodrën e Çabratit në Gjakovë.
Yllka Domi është shpallur dëshmore e kombit.
Liria ka emrin e të rënëve” shkruan Majko.