Kosova ia ka dalë që të mbijetojë në Ligën C, duke i dhënë fund makthit të saj që zgjaste prej 10 ndeshjesh. “Dardanët” nuk regjistronin një fitore në ndeshje zyrtare apo miqësore që nga tetori 2019 dhe pas këtyre 10 sfidave pa suksese, gjetën fitoren pikërisht atëherë kur u duhej më shumë përballë Moldavisë.
Ndaj ekipit që ka trajner ish-drejtorin teknik të Vllaznisë, Engin Firat, Kosova arriti të fitonte 1-0 falë golit të Lirim Kastratit në pjesën e parë, por vuajti gjatë të gjithë sfidës pasi moldavët vunë shpesh në vështirësi prapavijën e “Dardanëve”.
Megjithatë, në fund diferencën e bëri pikërisht ai gol, që ngjiti Kosovën në kuotën e 5 pikëve dhe i siguroi vazhdimësinë në Ligën C, ndërsa Moldavia shkoi në play-off për rënien në Ligën D. Nga ky grup në Ligën B u ngjit Sllovenia, e cila barazoi 0-0 me Greqinë në sfidën e fundit.