Ish-gjyqtari i Apelit në Tiranë, Alaudin Malaj, ka kërkuar që të rishqyrtohet çështja e tij në shkallën e parë të Vettingut. Malaj ka paraqitur një kërkesë pranë Kolegjit të Posaçëm të Apelimit, ku ka kërkuar rikthimin e çështjes së tij në shkallën e parë të Vetingut.
Përvec kësaj, Malaj ka kërkuar gjithashtu edhe përjashtimin nga gjykimi të komisioneres Etleda Çiftja.
“Prishjen e vendimit nr. 294, datë 15.09.2020 të Komisionit të Pavarur të Kualifikimit si një vendim që është rrjedhojë e cenimit të parimit të paanësisë në mënyrën e formimit dhe përbërjen e trupit gjykues. Prishjen e vendimit datë 15.04.2020 të Komisionit të Pavarur të Kualifikimit për rrëzimin e kërkesës për përjashtim duke vendosur: Pranimin e kërkesës së subjektit të rivlerësimit, dhe përjashtimin e komisioneres Etleda Çiftja nga përbërja e trupit gjykues. Dërgimin e çështjes së rivlerësimit të subjektit të rivlerësimit Alaudin Malaj pranë Komisionit të Pavarur të Kualifikimit për t’u gjykuar nga një trup tjetër gjykues”, thuhet në kërkesën e Malajt, ku nënkuptohet dhe kërkesa e përjashtimit të Çiftjes.
Tashmë KPA ka nisur përgatitjet për gjykimin e çështjes. Shorit është hedhur dhe është paracaktuar trupa gjykuese e kryesuar nga Rezarta Schuetz, me relator Sokol Çomon dhe anëtarë Albana Shtylla, Ardian Hajdari dhe Ina Rama.
Malaj dha dorëheqjen nga detyra në korrik të vitit 2020, pas 27 vitesh karrierë. Kjo kërkesë u pranua nga KLGJ-ja po në të njëjtin muaj.