BURREL / Të paktën 750 milion lekë ka dhënë qeveria shqiptare për banorët bashikisë së Matit, të dëmtuar nga tërmeti i këtij viti. Grupet e punës kishin evidentuar 544 banesa të dëmtuara, kryesisht në njësitë administrative Derjan, Macukull, Lis, etj. Sakaq pas verifikimeve të kryera nga Prefektura Dibër dhe Emergjencat Civile rezultuan me dosje të rregullta 314 banesa të dëmtuara, 32 janë në proces kontrolli dhe dosjet e tjera rezultuan me probleme. Ministrja e Mbrojtjes Olta Xhacka dhe drejtori i Përgjithshëm i Emergjencave Civile Haki Cako kanë vizituar disa here familjet e dëmtuara. Fillimisht Emergjencat Civile ofruan cadra për strehimin e familjeve, pastaj ushqime dhe veshmbathje. Qeveritarët premtuar se sapo këshilli bashkiak të kishte miratuar listën e përfituesve do të lëvrohej fondi i kërkuar. Dhe kështu ka ndodhur. Lajmin se paratë janë dërguar në thesar dhe se familjet e dëmtuara mund t’i tërheqin ato pranë sporteleve të Postës Shqiptare e dha Prefekti i Qarkut Dibër, Nexhmendin Shehu. Banorët që kanë përfituar nga buxheti i shtetit falenderuan qeverinë shqiptare që u interesua dhe dha në kohë rekord lekët për ndërtimin dhe riparimin e banesave. / Pajtim Hasa /
