Pasi i janë hequr minutat për të folur në Kuvend grupit demokrat, deputeti Myslim Murrizi është shfaqur i revoltuar. Vendim i marrë ky pasi në Kuvend do të flasë presidentja në detyrë e Kosovës, Vjosa Osmani.
Murrizi tha se çdo lëvizje në minutash nuk mund të bëhet në kurriz të deputetëve të opozitës.
“Së pari ky është parlamenti i Shqipërisë, dhe duhet të funksionojë në bazë të rregullores. Nuk ka asnjë shans askush, që të heq në mënyrë arbitrare minutat, për shkak se paska axhendë të ngarkuar Kuvendi. Me grupin tuaj socialist bëni ça të keni qejf, se për ju flet i pari juaj sa për të gjithë ju, për çdo natë dhe për çdo ditë, në ertv dhe në tvt.
Unë nuk besoj se 30 minutëshi që keni lënë për presidenten në detyrë nuk është shkak që deputetëve të opozitës t’iu pjesëtohet me 3 koha që kanë në dispozicion. Në fjalën kemi, pallavrat, dënglat dhe tenderat i keni ju. Deputetët kërkojnë kohën e tyre, askush nuk ka të drejtë që të lëviz minutat që u dëgoj unë”, u shpreh Murrizi në Kuvend.
Për shkak të situatës së Covid në Kuvend, koha që kanë në dispozicion deputetët është ulur ndjeshëm, ndërkohë që kohëzgjatja e seancave nuk duhet të kalojë më shumë se 3 orë.