Gazetari Artan Hoxha ka deklaruar se majori dhe piloti Sokol Feka është qëlluar dhe është vrarë në Spanjë dhe nuk vdiq aksidentalisht. I ftuar në “Çim Peka Live”, Hoxha tha se hetimi në atë kohë nisi por u ndërpre si çdo gjë në Shqipëri dhe nuk nxorri asgjë në dritë.
Gazetari shtoi se ngjarja që u raportua si aksident në vitin 2015 nga ministrja e asaj kohe, Mimi Kodheli, ishte në fakt vrasje. Hoxha theksoi se madje Guardia Civile në Spanjë, deklaronte në atë kohë se ishte hera e tetë që dëshironin ta kapnin Fekën, por ishte shumë i zoti.
“Ne kemi specialistë për këtë punë. Ne jemi problematike sepse po eksportojmë tashmë edhe fuqi punëtore. Edhe në Angli që e bëjnë me llampa. Grupet shqiptarë janë ekspertë në trafikun e kokainës në Spanjë. Kemi vrasje në Spanjë, në Brazil, se atje po merremi me kokainën. Edhe në Belgjikë, aty janë portet ku zbarkon kokaina. Kjo e Spanjë ka filluar pas vitit 2014, ata që nuk gjetën dot marrëveshje, shkuan emigrant. Ai atje atë punë do të bëjë, e dini sa skafistë nga Vlora kanë shkuar në Alicante? Në atë zonë që as vetë policia nuk të rekomandon që të shkosh atje. Në vitin 2015, me 1 ton kanabis nga Maroku në Malaga të Spanjës. zyrtarisht ai duhet të ishte në Londër për tu trajnuar. Edhe trafikantët i kishin blerë pikërisht helikopterin që donte ai. E di si shkoi kjo histori? U tha se nisi hetimi, u ndalua një major, etj…dhe më pas gjithçka u mbyll. Ai po trafikonte drgoë kur duhet të ishte duke u trajnuar. Guardia Civile e Spanjës thoshte që ishte hera e tetë që e bënte atë gjë dhe nuk e kapnin dot, ishte i aftë, fluturonte ulët dhe nuk e kapnin radarët. Aty kishte kanabis dhe çokollatë marokene. Thanë që ishte aksident, por ai u qëllua atje. Ishte pilot shumë i zoti. Fakt është që ai u qëllua atje,”- tha Hoxha.
Ngjarja e rëndë ndodhi në janar të vitit 2015. Sokol Feka humbi jetën teksa helikopteri që ai drejtonte nga Maroku në Spanjë u rrëzua, ngjarje që në atë kohë u raportua si aksident.
Mimi Kodheli para deputeteve duke iu referuar majorit të ndjerë Sokol Feka deklaroi si ai mashtroi sistemin duke kërkuar lejen e zakonshme dhe u largua nga vendi pa marrë leje nga autoritetet për daljen jashtë vendit. Major Feka ishte pjesë e Forcave të Armatosura prej 18 vitesh dhe mbante gradën major që nga viti 2009.