Në kafene “Panda”, që ndodhej përballë gjimnazit “Sveti Sava”, pasditen tragjike të 14 dhjetorit 1998, si zakonisht ishin mbledhur disa të rinj. Ata po konsumonin pijet e tyre të zakonshme dhe po luanin me letra….
Dy prej të rinjve që ndodheshin brenda në lokal, largohen duke lënë derën e jashtme të hapur. Ky është momenti, kur dy persona të veshur me të zeza, zbritën nga makina dhe u afruan pranë Kafe “Panda”.
Me tu futur në lokal, pa thënë asnjë fjalë, agresorët hapën zjarr me armë automatike në shënjestër të hapur.
U deshën vetëm 30 sekonda dhe 60 plumba për të shkaktuar një tragjedi me 6 të viktima, shumica nën 18-vjeç.
Agron Kollçaku asokohe 26 vjeç, është njëri prej 6 të arrestuarve dhe të dënuarve padrejtësisht. I akuzuar si kreu i grupit terrorist “Bombasi” që kreu vrasjet në kafenenë “Panda” dhe në Prilep, edhe 22 vite pas kësaj ngjarje ai nuk ka mundur të harrojë torturat në burgjet serbe.
“I ndiej edhe sot keqtrajtimet. Sa herë e vë kokën në jastëk i kujtoj, nuk kam mundur të harroj. Isha një natë shumë i sëmurë, nga vuajtja uria, i thashë jam sëmurë, po më dhemb kryet. Tash na mundemi edhe me ta heq kokën e nuk të dhëmb më. Më morën ashtu, këmbët e mia nuk më mbanin, kokën teposhtë, duart e lidhura dhe më cuan në spital dhe aty kanë tento me marrë edhe gjakun prej trupit tem, por një motër medicinale nuk e ka leju. Si në dorë të shkjaut ma”, – rrëfen Agron Kollcaku, ish i dënuar për rastin “Panda”.