Përmes një letre dërguar ministres së Drejtësisë Inspektorai i Lartë i Drejtësisë ka paraqitur problematikat 10-mujore, ku më të rëndësishmet janë plotësimi i vakancave në këtë institucion.
ILD i propozon ministres ndryshime ligjore për kushtet apo kriteret që duhet të plotësojnë kandidatët, për shkak se kushtet aktuale nuk i plotëson askush.
Në këto kushte, ILD kërkon të ulet pragu i vjetërsisë për kandidatët, nga 13 vite në 7.
Sipas ligjit për tu emëruar inspektor në ILD duhet të plotësosh kushtet njësoj si për Gjykatën e Lartë. Kujtojmë që ILD duhet të ketë 24 inspektorë, ndërkohë që ka vetëm 1.
“Gjatë punës 10 mujore janë evidentuar disa problematika, ku njëra prej tyre lidhet me garantimin e funksionimit të ILD duke plotësuar vakancat për inspektorë, po ashtu kërkohet trajtimi i njëjtë financiar i inspektorëve magjistratë dhe jo magjistratë si dhe rregullim i marrëdhënies së ILD-së dhe inspektorëve gjatë fazës së verifikimit të ankesave, hetimit disiplinor dhe inspektimit”,- thuhet në letrën e ILD.