Ditët në vijim do të jetë gati projektvendimi se si do të votojnë emigrantet dhe si do përgatitet lista, por kreu i KQZ Ilirian Celibashi megjithatë e quan një proces delikat.
Para publikimit të projektvendimit, kreu i KQZ-së u bën thirrje emigrantëve që paraprakisht të regjistrohen përmes portalit e-albania.
Celibashi korrigjoi një deklaratë të ministrit për Diasporën Pandeli Majko, i cili gjatë mbledhjes së Nënkomisionit për Diasporën dhe Emigrantët tha se emigrantët mund të votojnë edhe pa bërë deklarimet e adresave. Por Celibashi thekson se deklarimi i adresës duhet bërë.
Për emigrantë, ata duhet të hapin një llogari në e-albania, më pas të klikojnë në seksionin Familja, aty ku deklarohet edhe adresa e personit që jeton jashtë Shqipërisë. Hapi tjetër është përdorimi i shërbimit përmes krijimit të Aplikimit të Ri e më pas do të ketë një formular të posaçëm për tu plotësuar. Regjistrimi në portal nuk kërkon kosto.