Ditën e sotme ka nisur në Shqipëri vaksinimi kundër COVID-19. Një nga të parët që mori dozën “Pfizer” ishte kryeministri Edi Rama
Duke folur për këtë ngjarje, gazetari Baton Haxhiu tha se dështimi i projektit të COVAX për t’u siguruar vaksinën vendeve të Ballkanit Perëndimor bëri që vendet të nisin negociata për ta siguruar në rrugë individuale dhe këtu tha ai hynë në lojë njohjet e kryeministrit, Edi Rama. Haxhiu madje tha se, Shqipëria dhe të gjitha ato vende që kanë pritur vaksinat nga COVAX “janë mashtruar”.
“Fakti që COVAX nuk ishte në gjendje që ta sigurojë vaksinë për të gjithë këto vende, në këto momente vjen autoriteti i kryeministrit që përmes njohjes personale t’u ofrohet vaksinimi qytetarëve. Kjo duket e hiperbolizuar si fjali por njohjet personale ndihmojnë në zgjidhjen e këtij problemi”, u shpreh gazetari në Euronews.
Haxhiu shtoi më tej kryerja e vaksinimit nga vetë kryeministri tregon një model komunikimi me qytetarët. Gazetari nënvizoi më tej se gjatë janarit është parashikuar të mbërrijnë në Shqipëri 11 mijë vaksina kurse pjesa tjetër prej 500 mijë do të vijë çdo muaj nga një sasi e vogël.