“Ndalo dhe shpëto! Respekto sinjalistikën rrugore. Udhëtoni me kujdes”, janë disa prej këshillave që japin nxënësit në aksin rrugor Milot-Morinë, ku ndodhi aksidenti tragjik që mori jetën e katër anëtarëve të një familje nga Kosova.
Ata janë nxënës të Shkollës Profesionale Rrëshen dhe kanë dalë me pankarta në duar duke bërë apelin për të gjithë drejtuesit e mjeteve që shkelin sinjalistikën rrugore dhe më pas ndodhin ngjarjet e rënda.
Ngjarja e trishtë ndodhi 6 ditë më parë, ku automjeti tip tip “Citroen”, me të cilën po lëviznin nga Kosova drejt Shqipërisë, u përplas me një kamion si pasojë e parakalimit të gabuar.
Viktimat janë Blerim Avdiaj, 45 vjeç, bashkëshortja e tij, Anjeza Avdiaj, 34 vjeçe, si dhe dy fëmijët Medina Avdiaj, 5 vjeçe dhe një i afërm i tyre 11 vjeçar, Klejdi Koci. Vajza e vetme e mbijetuar nga aksidenti është 3-vjeçarja Violeta Avdiaj, e cila mori trajtim të specializuar në spitalin e Traumës.
