Gjatë orëve të natës dhe paradites së të dielës janë regjistruar reshje shiu në të gjithë territorin e vendit. Sa i përket përmbytjeve, përkeqësimi i motit ka shkaktuar sërish problematika në qarkun e Shkodrës.
Aktualisht probleme paraqitën në aksin rrugor të Bushatit, ndërsa një pjesë e rrugës së Obotit ndodhet nën ujë dhe nuk rekomandohet qarkullimi me mjete të ulëta. Bashkia Shkodër njofton se situata në këtë territor janë të përmbytura 748 hektarë tokë, ndërsa prurjet në lumin Kir janë rritur.
Situata ka qenë problematike edhe në disa akse rrugore.
Siç shihet në pamje, rrëshqitje të dherave në rrugë, ka patur në Qafën e Muzinës e në Bistricë të qarkut të Gjirokastrës, duke vështirësuar kështu qarkullimin e mjeteve. Për disa orë u bllokua aksi Përmet-Çarshovë. U desh ndërhyrja e punonjësve të mirëmbajtjes së rrugëve që aksi të zhbllokohej.
Edhe në qarkun e Korçës gjatë gjithë natës ka pasur reshje shiu me intensitet mesatar. Në lartësinë mbi 1300 m janë regjistruar reshje dëbore. Trashësia e saj ka shkuar në 10 centimetra. Autoriteti Rrugor ka paralajmëruar drejtuesit e mjeteve që udhëtojnë në rrugën Korçë/Boboshticë-Dardhë, nga km 8 deri në km 14, të përdorin zinxhirë ose goma dimërore.
Më problematike është situata në zonat e thella të Korçës. Në fshatrat Panarit, Grabockë e Vithkuq bora ka shkuar në 50 centimetra. Për pasojë rrugët janë të bllokuara.
Probleme ka patur edhe me furnizimin me energji elektrike në fidrin Nr. 6, të Mollasit në bashkinë Kolonjë. Sipas autoriteteve lokale aktualisht të gjitha rrugët në vend janë të kalueshme dhe pa probleme.