Një person është plagosur me kaçavidë mëngjesin e sotëm në qytetin e Korçës pas një sherri që ka ndodhur me një tjetër.
Informacionet e para mediatike bëjnë të ditur se i plagosuri është Emiljan Torollari, i cili ndodhet në spital, ndërsa fatmirësisht ndodhet jashtë rrezikut për jetën. Autori është identifikuar si shtetasi Thanas Saqellari, i cili është kapur pas disa orësh nga uniformat blu.
Ngjarja ka ndodhur për motive banale ku fillimisht 2 shtetasit kanë qenë në banesë dhe më pas konflikti u krijua në rrugë ku dhe autori e ka plagosur Torollarin me kaçavidë pas shpine.
NJOFTIMI
Plagosi me mjet të mprehtë një shtetas, vihet në pranga autori i dyshuar i ngjarjes së ndodhur mëngjesin e sotëm.
Specialistët për Hetimin e Krimeve në Komisariatin e Policisë Korçë bënë arrestimin në flagrancë të shtetasit Th. S., 45 vjeç, banues në Korçë.
Ky shtetas mëngjesin e sotëm, në lagjen nr. 18, gjatë një konflikti të çastit për motive të dobëta, ka goditur me mjet të mprehtë shtetasin E. T., 42 vjeç, banues në Korçë, i cili ndodhet në Spitalin e Korçës nën kujdesin e mjekëve.
Materialet në ngarkim të tij i kaluan Prokurorisë pranë Gjykatës së Shkallës së Parë Korçë për veprime të mëtejshme.