Kreu i Grupit Parlamentar të Partisë Socialiste, Taulant Balla i dha një mesazh kryedemokratit Lulzim Basha dhe kryetares së LSI-së, Monika Kryemadhi.
Ai tha se të dy duhet ta harrojnë se mund të ndryshojnë datën e zgjedhjeve.
Balla ironizoi edhe përfundimin e protestës, duke thënë se kryedemokratit Basha i kishte ardhur ora për të ngrënë.
“Doni apo nuk doni zgjedhjet lokale do mbahen më 30 qershor. Harrojeni se mandatin që na kanë besuar shqiptarët mund të tentoni ta bëni pis. Gjithë shqiptarët e dinë kush blen vota, i ka Lulzim Basha me vete”, tha Balla i ftuar në emisionin “Kjo Javë” në News 24.
Gjatë protestës së sotme, Taulant Balla tha se u dëmtua prona publike dhe për këtë Prokuroria e Tiranës duhet t’i ketë nisur tashmë hetimet.
“Prokuroria e Tiranës duhet të ketë filluar hetimet pasi ka pasur dëmtim të pronës publike, që solli reagimet e gjithë ndërkombëtarëve. Ajo që kam thënë është shumë e qartë, masat ndëshkimore penale i përcakton Kodi Penal”,- tha ai.
Ndërsa për dëmtimin e veprës së artit në krah të Kryeministrisë, Balla u shpreh: “Nuk di pse dha urdhër të dëmtohej kërpudha, di që Berisha është i fandaksur nga e bukura, por Basha si njeri që ka jetuar në Holandë duhet të hiqte dorë”.
Balla tha ndër të tjera se edhe thirrjet e Sali Berishës për dhunë janë të dënueshme. “Ultimatumet e Berishës janë shprehje të pakontrolluara të një burri në moshë. Thirrjet e papërgjegjshme të Sali Berishës janë të dënueshme”.