Kryetari i BDI-së, Ali Ahmeti, ka reaguar në rrjete sociale pas një takimi me kryeministrin e Shqipërisë, Edi Rama, të cilin e ka cilësuar si mikun e tij.
Përmes këtij reagimi, Ahmeti bëri të ditur se biseda u përqendrua te çështjet me interes të përbashkët kombëtar, thellimi i bashkëpunimit mes Shqipërisë dhe Maqedonisë së Veriut, perspektiva evropiane dhe partneriteti në kuadër të NATO-s.
Ai theksoi se takimi merr një domethënie të veçantë pasi u zhvillua më 22 Nëntor, në Ditën e Alfabetit të Gjuhës Shqipe dhe në prag të 28 Nëntorit, Ditës së Flamurit dhe Pavarësisë së Shqipërisë.
“Ky takim merr një domethënie të veçantë edhe për faktin se zhvillohet më 22 Nëntor, në Ditën e Alfabetit të Gjuhës Shqipe, dhe në vigjilje të 28 Nëntorit, Ditës së Flamurit dhe Pavarësisë së Shqipërisë.
Këto ditë të Nëntorit të Madh na rikujtojnë rrugëtimin tonë historik, sakrificat ndër breza dhe rëndësinë e bashkimit rreth gjuhës, flamurit dhe interesave tona kombëtare.”
Ahmeti nënvizoi rëndësinë e forcimit të lidhjeve mes shqiptarëve kudo që jetojnë, duke bërë thirrje për bashkëpunim dhe kontribut të përbashkët drejt një të ardhmeje evropiane dhe të sigurt.
“Gëzuar 22 Nëntorin dhe le të na bashkojë gjithmonë fryma e Nëntorit shqiptar!” përfundoi reagimin e tij kryetari shqiptar i BDI-së.

