Kryeministri Edi Rama ka reaguar pas arrestimeve të reja në spitalin “Shefqet Ndroqi”, pas skandalit “Tirja”. Ai e konsideroi një lajm të mirë vijimin e hetimeve dhe e konsideroi një mesazh të qartë për qytetarët që të denoncojnë.
“Lajmi shumë i mirë i prangosjes dhe të katër të tjerëve në kuadrin e hetimeve të thelluara që nisën pas denoncimit publik të një qytetareje përmes emisionit investigativ “Stop”, është një lajm shumë i mirë sepse është një mesazh shumë i qartë për qytetarët të cilët nuk duhet të ngurrojnë të denoncojnë në çdo drejtim që e shohin të arsyeshme, përfshi dhe mediat investigative që gjej rastin ti falenderoj”, tha Rama.
Ai shtoi se do të ketë një thellim të reformës së sistemit shëndetësor ku foli dhe për autonominë spitalore.
“Kura afatgjatë dhe e suksesshme për të adresuar plagën kanceroze të ryshfetit në sistemin shëndetësor është thellimi i reformës së sistemit, reformë që ne e kemi nisur dhe tani kemi një bazë solide ëpr të hedhur hapin e madh të autonomisë spitalore të motivimit të mëtejshëm të mjekëve në bazë të kartës së performancës së tyre, të diversifikimit sipas performancës dhe të shpërblimit të mjekëve dhe natyrisht të kalimit në tërësi në një fazë tjetër ku faktikisht bazuar në modelet më të mira dhe praktikat më të mira mund të arrijmë dhe do të arrijmë që spitalet publike të funksionojnë me një logjikë që harmonizon shërbimin falas për qytetarët me shpërblimin motivues për mjekët”, u shpreh Rama.