Pak orë pas vrasjes në lagjen “Uji i Ftohtë” në Vlorë ku mbetën të vrarë 2 shtetas dhe 1 tjetër u plagos, policia ka gjetur edhe makinën e djegur të autorëve të dyshuar.
Nga verifikimi që grupi i posaçëm hetimor ka bërë për sqarimin e rrethanave dhe identifikimin e ndalimin e personave të implikuar në ngjarje, ka gjetur brenda makinës edhe dy kallashnikovë.
Policia shpreson që nga gjurmët në makinë dhe të armëve të identifikojë edhe autorin apo autorët e këtij krimi të shumëfishtë.
Sipas informacioneve te para, behet e ditur se objektiv i atentatit ishte Armando Sulejmani, i njohur me pseudonimin “Çipuri” dhe qe mbeti i plagosur. Nderkohe qe humben jeten Orest Rexho kunati i Sulejmanit dhe Arjan Hasani, miku i tij.
HISTORIA E HAKMARRJEVE
Armando Sulejmanit i është bërë atentat edhe në vitin 2016, teksa hynte në banesën e tij në lagjen “Pavarësia”, në qytetin bregdetar, ku i shpëtoi 11 plumbave duke e kapur vetëm njëri prej tyre. Ai njihet si person me precedentë të shumtë penal.
42-vjeçari njihet nga policia si anëtar i bandës së Gaxhait. Ai ishte i dënuar me 20 vite burg për vrasje, ndërsa fitoi lirinë rreth 3 vite më parë.
Në një informacion paraprak për ngjarjen, policia tha se “një grup i posaçëm hetimor u ngrit menjëherë dhe po punon për sqarimin e rrethanave dhe identifikimin e ndalimin e personave të implikuar në ngjarje. Për shkak të hetimeve nuk mund të bëhen të ditura detaje të tjera”.
Në janar të këtij viti në një tjetër atentat në Vlorë mbeti i plagosur Mikel Mehmeti nga Selenica e Vlorës, njohur si anëtar i bandës së Llanajve. Llanajt njihen për masakrën e Çolës, ku pas një sherri në kazino në prill të vitit 2015, u vranë 3 të rinj.
Një nga autorët e masakrës është Aleksandër Llanaj, që po vuan dënimin në burg.
Armando Suljemani, “Çipuri”, ka qenë i dyshuar edhe për një atentat të dyfishtë në nëntor të 2018-ës në qytetin e Durrësit.