Ambasadorja e SHBA-së, Yuri Kim, ka reaguar në lidhje me operacionin e ndërmarrë sot nga SPAK, ku u arrestua gjyqtarja e Krujës, Enkeleda Hoxha, një avokat dhe kryesekretarja e gjykatës.
Nga Porti i Durrësit, Kim tha se Reforma në Drejtësi nuk është një mrekulli, por ndodh hap pas hapi dhe duhet të zhvillohet. Ajo ftoi qytetarët mos të jenë skepktikë dhe mos të bien pre e propagandave.
“Reforma në Drejtësi është me rëndësi. Për të gjithë skeptikët që kanë thënë se s’ka për të ndodhur gjë; që reforma dhe SPAK s’ka për të funksionuar, kam një lajm për ju: E keni gabim! Dua t’ju inkurajoj që të shihnit të gjitha hapat që ka ndërmarr SPAK, siç është dhe rasti i çështjes sot në Krujë. Reforma në Drejtësi nuk është një mrekulli, por ndodh hap pas hapi dhe duhet të zhvillohet. Duhet të jemi ne ata që duhet ta ngrejmë dhe të ecim përpara. Duhet ta shtyni veten dhe të shkoni kundër skepticizmit. Ndaj fokusohuni në fakte, shihni se çfarë është duke bërë SPAK dhe policia. Mos lejoni të shpërqendroheni nga propaganda”, tha Yuri Kim.